Ekspertët kundër fiskalizimit: Ja çfarë rrezikon biznesi

Ekspertët e çështjeve fiskale dhe kontabilistët, ata që janë në kontakt të drejtpërdrejtë me biznesin kanë kundërshtuar ashpër fiskalizimin, procesin e nisur me bujë nga Ministria e Financave dhe që parashikon deklarimin e faturave nëpërmjet një aplikacioni online.

Për ish-drejtorin e Përgjithshëm të Tatimeve, Artur Papajani, ky proces do të ketë kosto për biznesin dhe administratën, pasi asnjëra palë nuk është gati ta zbatojë. Sipas tij, as shtyrja me tre muaj e hyrjes në fuqi të fiskalizimit nuk do të ndihmojë në zbatimin e tij në terren, pasi koha në shërbim të bizneseve dhe administratës është e pamjaftueshme.

“Bëhet fjalë për një masë të madhe biznesesh jashtë kryeqytetit, të cilët do të kenë probleme. Kam përshtypjen që do ta çorientojë administratën”, thotë Papajani.

Ish kreu i Tatimeve parashikon se biznesi do të përballet me probleme të shumta gjatë zbatimit të fiskalizimit, duke rrezikuar që të gjobiten, ashtu siç parashikon tashmë edhe drafti që konkretizon këtë proces.

“Për periudhën e vitit të parë nuk ishte nevoja të zbatoheshin penalitetet. Që në muajin e parë, të përballet një biznes me penalitet. Ministria duhet të kishte shoqëruar një masë tjetër tranzitore në ligj që në të gjithë vitin 2020 të mos zbatohej asnjë penalitet”, shprehet Papajani.

Ministria e Financave ka njoftuar se bizneset e vogla do të përfitojnë falas aplikacionin, por kjo nuk do të thotë se nuk do të ketë kosto të tjera shtesë, për mirëmbajtjen, kompjuterët, printerët etj. Ndërkohë që bizneset e tjera duhet të paguajnë edhe për aplikacionin. Ministrja e Financave, Anila Denaj ende nuk e ka bërë publike sesa është kjo kosto, edhe pse premtoi që shifra do të bëhej publike që në shtator.