‘100 të rinj që fitojnë 1-8 mijë euro në muaj’, Rama: Do krijojmë rrjet në të gjithë Shqipërinë


Në një takim online në lidhje me mbështetjen e Star up-eve të reja, kryeministri Edi Rama iu është përgjigjur skeptikëve në lidhje me deklaratat e bëra pak ditë më parë se në Korçë ka të rinj të cikët paguhen 1-8 mijë euro në muaj.

Sipas Ramës, shumë të rinj sot janë dëshmitarë të këtij realiteti që ndodh jo vetëm në qytetin e Korçës. Ai vijoi më tej duke thënë se  janë gati qendrat në disa qytetet të Shqipërisë duke nisur nga piramida në Tiranë, në Korçë, Shkodër, Vlorë të cilat do trajnojnë të rinjtë në fushën e kodimit për të fituar paga të kënaqshme e për këtë pa qenë nevoja të dalin nga vendi.

“Jemi në proces për të bërë gati një hapësirë fantastike me standarde më të larta europiane dhe bashkëkohore për të strehuar shumë iniciatorë dhe për ta kthyer piramidën në qendër të madhe inovacioni.

Në Korçë është hapur programi fleksibël për mbështetjen e start up-eve njësoj si në Shkodër. Korça ka marrë një fond për të mbështetur realisht këtë projekt. Në Vlorë jemi duke përgatitur transformimin e asaj godinës fantazëm në një qendër të komunitetit për kodimin dhe duam të krijojmë një rrjet të tërë me qendra të tilla në të gjitha qendrat e qarqeve të Shqipërisë që të rinjtë të përfshihen në këtë rrjet dhe të trajnohen për t’u kthyer në kodues dhe për të marrë dhe dije të tjera, për të dalë në një treg pa dalë nga Shqipëria. Kam parë përqeshje për atë që thashë se ndodh në Korçë por edhe ju jeni dëshmitar të këtij realiteti që të rinjtë mund t’i japin vetes punë me pasion dhe jo thjesht për t’u ushqyer dhe për t’u paguar ashtu sikur askujt nuk ia pret mendja se mund të arrihet”, tha Rama.