Berisha paralajmëroi padi ndaj sekretarit Blinken, reagon për herë të parë SHBA


Pas deklaratës së ish-Kryeministrit Sali Berisha për padi ndaj sekretarit Antony Blinken ka reaguar Departamenti Amerikan i Shtetit.

Një zëdhënës i DASH tha për Zërin e Amerikës se “nuk janë në dijeni të ndonjë padie gjyqësore”.

NJë ditë më parë, ish-kryeministri Sali Berisha deklaroi në një konferencë për mediat se i ka shpallur “luftë”  Sekretarit amerikan të Shtetit, Antony Blinken, ndaj të cilit do të ngrejë një padi për shpifje.

Ish-kreu i qeverisë u shpreh më herët se padia do të ngrihet në Francë, në një shtet neutral dhe tha se sipas avokatit të tij, Sekretari Blinken nuk mund të ketë mbrojtje për shkak të detyrës së tij.

“Jam këtu për të informuar ju, për një vendim të pazakontë por të rëndësishëm. Për arsye që janë tërësisht që janë të panjohura për mua, Sekretari Amerikan i Shtetit, ka publikuar dje pa asnjë paralajmërim dhe në mënyrën më shpifëse një vendim për mua. Dua të theksoj se në të gjithë jetën time politike, por mund të shkoni dhe më tutje që kur kam prekur rrogën e parë, e deri më sot nuk ka njeri në Shqipëri apo në botë që të thotë që unë jam i implikuar në një aferë korruptive. Ndaj dhe unë kam autorizuar avokatin tim në një vend neutral në Francë që të ngre një padi kundër zotit Blinken për shpifje publike në Gjykatën e Parisit”, ishte kjo një pjesë e deklaratës së Sali Berishës.

Berisha pohoi se vendimi i DASH i ka prekur “dinjitetin” teksa theksoi se beteja do të jetë kundër Blinken dhe jo kundër SHBA-së.