“La dhimbjen mënjanë për të mu gjendur pranë” U ndanë para shumë vitesh, Soni flet për raportin me Florin


Këngëtarja e njohur Soni Malaj ka arritur të marrë mjaft vëmendje nëpërmjet këngës së saj më të fundit me titull “Versioni im”.

Gjatë intervistës në programin “Abc e pasdites”, Soni ka treguar që askush nuk e dinte se ajo do të merrte pjesë në Këngën Magjike.

Ndërkohë bashkëpunimi me Flori Mumajesin ka qenë një nga temat më të përfolura, pasi ata rikthehen pas 10 vitesh.

Kujtojmë që dyshja e njohur kanë qenë në një lidhje dashurie, që nuk arriti ti mbijetonte kohës dhe u ndanë.

Por duket se ata vijojnë të mbajnë një marrëdhënie të mirë me njëri-tjetrin, ku Flori ka arritur madje të bëjë dhe produksionin e këngës së Sonit.

Këngëtarja tha se e vlerësonte jashtëzakonisht shumë gjithë punën dhe vëmendjen profesionale të Florit në këtë moment të vështirë të jetës së tij, pasi ka humbur njërin nga prindërit.

Ndër të tjera theksoi se gjatë kësaj kohe kanë qenë miq pavarësisht se nuk e kanë bërë publike.

“Po unë me Florin kemi pasur marrëdhënie njerëzore të vazhdueshme pavarësisht se nuk e kemi bërë kaq publike. Ndër vite kemi qenë në kontakt dhe ruajmë një respekt shumë të madh për njeri tjetrin. Ne rrugëtimin tonë njerëzor e kemi nisur si miq dhe jemi prapë miq. Me gjithë kohën jo të mirë që Flori po kalon me ndarjen nga jeta të njeriut më të rëndësishëm të jetës së tij, përkushtimi i tij ndaj meje, ndaj materialit ka qenë maksimal. Ka lënë dhimbjen e tij mënjanë për t’mu gjendur mua pranë në këtë konkurs dhe për të më përkrahur”, rrëfeu Soni ndër të tjera.